ပန္နရသီပဝါရဏာပြုနိုင်ပုံ
------------------------------------
( ဝိနည်းမဟာဝါပါဠိတော် ပဝါရဏက္ခန္ဓကလာ - ဘဏ္ဍနကာရကဝတ္ထု )
ကောသလတိုင်း တခုသော ဇနပုဒ်၌ သန္ဒိဋ္ဌ သမ္ဘတ္တ (မိတ်ဆွေ) ရဟန်းတော်များ ဝါဆိုဝါကပ်ကြ၏၊ ထိုရဟန်းတို့၏ မနီးမဝေးကျောင်း၌ ဘဏ္ဍနကာရက (ငြင်းခုံခိုက်ရန်ပြုတတ်သော) ရဟန်းတော်များသည် ဝါဆိုဝါကပ်ကြသည်၊ ထိုသန္ဒိဋ္ဌ သမ္ဘတ္တ ရဟန်းတော်များ၏ ပဝါရဏာကို တန့်ထားရန်အတွက် ဖြစ်သည်။
ထိုအကြောင်းကို သန္ဒိဋ္ဌ သမ္ဘတ္တ ရဟန်းတော်များက ကြားသိရ၍
ဒီကိစ္စနှင့် ပတ်သက်၍ တို့ ဘယ်လိုလုပ်ရပမလဲ-ဟု တိုင်ပင်ကြပြီး မြတ်စွာဘုရားအား ထိုအကြောင်းကို လျှောက်ထားကြကုန်၏။
မြတ်စွာဘုရားက..
အနုဇာနာမိ ဘိက္ခဝေ တေဟိ ဘိက္ခူဟိ ဒွေ တယော ဥပေါသထေ စာတုဒ္ဒသိကေ ကာတုံ "ကထံ မယံ တေဟိ ဘိက္ခူဟိ ပဌမတရံ ပဝါရေယျာမ"တိ။
ငါတို့သည် ဘယ်လိုနည်းနဲ့ ထိုဘဏ္ဍနကာရက ရဟန်းများတို့မှ ရှေးဦးစွာ ပဝါရဏာပြုရပါကုန်အံ့နည်းဟု ကြံစည်၍ ထိုသန္ဒိဋ္ဌ သမ္ဘတ္တ ရဟန်းတော်များသည် (ဝါတွင်း၌) ၂-ဥပုသ် ၃-ဥပုသ်တို့ကို စာတုဒ္ဒသီဥပုသ် ပြုခြင်းငှာ ငါဘုရား ခွင့်ပြုတော်မူ၏။-မိန့်တော်မူသည်။
ဝါဆိုလကွယ်မှ တော်သလင်းလကွယ်အထိ (၅)ဥပုသ်ရှိသည်။
(၁) ထိုတွင် တတိယမြောက် ဝါခေါင်လကွယ်ဥပုသ်နှင့် စတုတ္ထမြောက် တော်သလင်းလပြည့်ဥပုသ် (သို့မဟုတ်) ပဉ္စမမြောက် တော်သလင်းလကွယ်ဥပုသ် တို့ကို ရည်ရွယ်၍ ဒွေ-ဟူ၍၎င်း၊
(၂) ထို ၃-ဥပုသ်လုံးကို ရည်ရွယ်၍ တယော-ဟူ၍၎င်း ဟောတော်မူသည်။
(၁) ဝါခေါင်လကွယ်နေ့ကား ထုံးစံအတိုင်း (၁၄)ရက် ဖြစ်သောကြောင့် စာတုဒ္ဒသီဖြစ်အောင် အထူးပြုဘွယ်မလို။
တော်သလင်းလပြည့်နေ့ကား ပန္နရသီဥပုသ်နေ့ ဖြစ်သောကြောင့် ထုံးစံအတိုင်းဆိုလျှင် လပြည့်နေ့ရောက်မှ ဥပုသ်ပြုရမည်။ ယခုမူကား (ဘဏ္ဍနကာရက ရဟန်းတို့မှ ရှေးဦးစွာ ပဝါရဏာ ပြုနိုင်ဖို့ရန်) တော်သလင်းလဆန်း(၁၄)ရက်နေ့၌ စာတုဒ္ဒသီဥပုသ်ပြုပါ။
ဤဥပုသ်ကို စာတုဒ္ဒသီဥပုသ်မပြုလျှင် တော်သလင်းလကွယ်နေ့ မရောက်မီ တော်သလင်းလပြည့်ကျော်(၁၄)ရက်နေ့၌ စာတုဒ္ဒသီဥပုသ်ပြုပါ။ (ဒွေ-အတွက်)
ဝါခေါင်လကွယ်(၁၄)ရက်နေ့ စာတုဒ္ဒသီဥပုသ်ပြု
တော်သလင်းလဆန်း(၁၄)ရက်နေ့ စာတုဒ္ဒသီဥပုသ်ပြု
(တနည်း)
ဝါခေါင်လကွယ်(၁၄)ရက်နေ့ စာတုဒ္ဒသီဥပုသ်ပြု
(တော်သလင်းလပြည့်နေ့ ပန္နရသီဥပုသ်ထုံးစံပြု)
တော်သလင်းလပြည့်ကျော်(၁၄)ရက်နေ့ စာတုဒ္ဒသီဥပုသ်ပြု (ပါဠိတော်လာ ဒွေ-အတွက် စာတုဒ္ဒသီဥပုသ် (၂)ရက်ပြုပုံ ၂-နည်း)
(၂) တော်သလင်းလပြည့် လကွယ် ၂-ဥပုသ်လုံးကို စာတုဒ္ဒသီဥပုသ်ပြုလိုလျှင် တော်သလင်းလဆန်း(၁၄)ရက်နေ့၊ တော်သလင်းလပြည့်ကျော်(၁၃)ရက်နေ့တို့၌ စာတုဒ္ဒသီဥပုသ်ပြုပါ။ (တယော-အတွက်)
ဝါခေါင်လကွယ်(၁၄)ရက်နေ့ စာတုဒ္ဒသီဥပုသ်ပြု
တော်သလင်းလဆန်း(၁၄)ရက်နေ့ စာတုဒ္ဒသီဥပုသ်ပြု
တော်သလင်းလပြည့်ကျော်(၁၃)ရက်နေ့ စာတုဒ္ဒသီဥပုသ်ပြု (ပါဠိတော်လာ တယော-အတွက် စာတုဒ္ဒသီဥပုသ် (၃)ရက်ပြုပုံ)
တော်သလင်းလဆန်း(၁၄)ရက်
တော်သလင်းလပြည့်ကျော်(၁၃)ရက်
တော်သလင်းလပြည့်ကျော်(၁၄)ရက်တို့၌ ပြုသော စာတုဒ္ဒသီဥပုသ်တို့ကား ဝိကတိစာရိတ္တဥပုသ်တို့မည်၏။
(၁)(က) ဝါခေါင်လကွယ်နှင့် တော်သလင်းလဆန်း(၁၄)ရက်တို့၌ စာတုဒ္ဒသီဥပုသ်ပြုလျှင် တော်သလင်းလဆန်း(၁၅)ရက်နေ့သည် သန္ဒိဋ္ဌ သမ္ဘတ္တ ရဟန်းများအတွက် တော်သလင်းလပြည့်ကျော်(၁)ရက်နေ့တည်း၊ (တရက်ခိုးထားသည်ကို သတိပြု) ထိုမှ စ၍ ရေတွက်သောအခါ တော်သလင်းလပြည့်ကျော် (၁၄)ရက်နေ့၌ (၁၅)ရက်ပြည့်၍ ပန္နရသီဥပုသ်ပြု၊
(၁)(ခ) တော်သလင်းလပြည့်ကျော် (၁၅)ရက်နေ့သည် သန္ဒိဋ္ဌ သမ္ဘတ္တ ရဟန်းများအတွက် သီတင်းကျွတ်လဆန်း(၁)ရက်နေ့တည်း၊ ထိုမှ စ၍ ရေတွက်သောအခါ သီတင်းကျွတ်လဆန်း(၁၄)ရက်နေ့၌ (၁၅)ရက်ပြည့်၍ ပန္နရသီပဝါရဏာ ပြုနိုင်တော့သည်၊ (ဒွေ-အတွက် ပထမနည်း)
(၂) ဝါခေါင်လကွယ်နှင့် တော်သလင်းလပြည့်ကျော်(၁၄)ရက်တို့၌ စာတုဒ္ဒသီဥပုသ်ပြုလျှင် တော်သလင်းလပြည့်ကျော်(၁၅)ရက်နေ့သည် သန္ဒိဋ္ဌ သမ္ဘတ္တ ရဟန်းများအတွက် သီတင်းကျွတ်လဆန်း(၁)ရက်နေ့တည်း၊ (တရက်ခိုးထားသည်ကို သတိပြု) ထိုမှ စ၍ ရေတွက်သောအခါ သီတင်းကျွတ်လဆန်း(၁၄)ရက်နေ့၌ (၁၅)ရက်ပြည့်၍ ပန္နရသီပဝါရဏာ ပြုနိုင်တော့သည်၊ (ဒွေ-အတွက် ဒုတိယနည်း)
(၃)(က) ဝါခေါင်လကွယ်နှင့် တော်သလင်းလဆန်း(၁၄)ရက်တို့၌ စာတုဒ္ဒသီဥပုသ်ပြုလျှင် တော်သလင်းလဆန်း(၁၅)ရက်နေ့သည် သန္ဒိဋ္ဌ သမ္ဘတ္တ ရဟန်းများအတွက် တော်သလင်းလပြည့်ကျော်(၁)ရက်နေ့တည်း၊ (တရက်ခိုးထားသည်ကို သတိပြု) ထိုမှ စ၍ ရေတွက်သောအခါ တော်သလင်းလပြည့်ကျော် (၁၃)ရက်နေ့၌ (၁၄)ရက်ပြည့်၍ စာတုဒ္ဒသီဥပုသ်ပြု၊ (၂-ရက်ခိုးထားသည်ကို သတိပြု)
(၃)(ခ) တော်သလင်းလပြည့်ကျော် (၁၄)ရက် (၁၅)ရက်တို့သည် သန္ဒိဋ္ဌ သမ္ဘတ္တ ရဟန်းများအတွက် သီတင်းကျွတ်လဆန်း(၁)ရက် (၂)ရက် နေ့တို့တည်း၊ ထိုမှ စ၍ ရေတွက်သောအခါ သီတင်းကျွတ်လဆန်း(၁၃)ရက်နေ့၌ (၁၅)ရက်ပြည့်၍ ပန္နရသီပဝါရဏာ ပြုနိုင်တော့သည်၊ (တယော-အတွက်)
တဝါတွင်း၌
စာတုဒ္ဒသီဥပုသ် (၂)ရက်ပြုခဲ့လျှင် သီတင်းကျွတ်လဆန်း(၁၄)ရက်နေ့၌
စာတုဒ္ဒသီဥပုသ် (၃)ရက်ပြုခဲ့လျှင် သီတင်းကျွတ်လဆန်း(၁၃)ရက်နေ့၌ ပန္နရသီပဝါရဏာပြုနိုင်တော့သည်။
တော်သလင်းလဆန်း(၁၄)ရက်၊ တော်သလင်းလပြည့်ကျော်(၁၃)ရက် (၁၄)ရက်တို့၌ စာတုဒ္ဒသီဥပုသ်ပြုခြင်းသည် ဘဏ္ဍနကာရက ရဟန်းတို့မှ ရှေးဦးစွာ သီတင်းကျွတ်လဆန်း(၁၃)ရက် (သို့မဟုတ်) (၁၄)ရက်တို့၌ ပန္နရသီပဝါရဏာ ပြုရခြင်းအကျိုးရှိ၏။
ဤသို့ ပဝါရဏာ နေ့ရက် မတူအောင် ရက်အပြောင်းအလွဲ ပြုလုပ်ထားသော်လည်း စိတ်မချရသေးသောကြောင့် ပဝါရဏာ ပြုခါနီးဝယ် ကျောင်းတိုက်အပြင်ဘက်၌ သာမဏေများကို အစောင့်အရှောက် ချထားပါ၊ ဘဏ္ဍနကာရက ရဟန်းတော်များ လာသည်ဟု ကြားရလျှင် မြန်မြန် သံဃာစုဝေး၍ ပဝါရဏာပြုပါ။
ဥပုသ်ပြုရာ၌ စာတုဒ္ဒသီ ပန္နရသီ အသုံးအနှုံးသည်
မိုးပေါ်က "လ"အနေအထားကို ကြည့်၍ သုံးနှုံးရခြင်းမဟုတ်။
လောကဝေါဟာရကို ကြည့်၍လည်း သုံးနှုံးရခြင်းလည်း မဟုတ်။
ရဟန်းတော်များ၏ ဥပုသ်ပြုရာ ရက်အစဉ်ကို လိုက်၍ သုံးနှုံးရခြင်း ဖြစ်သည်ဟု မှတ်ပါ။
( ဝိ၊၃။၂၅၉-မှ၂၆၁။ ဝိ၊ဋ္ဌ၊၃။၃၆၁-၃၆၂။ ဝိမတိ၊၂။၁၈၁။ မဟာဝါဘာသာဋီကာ၊၂။၅၂-မှ၅၅။ တို့၌ ကြည့်ပါ။ )
🙏မစိုးရိမ်တိုက်သစ် အရှင်မဟာကဝိန် ရေးသားသည်ကို ပြန်လည်ပူဇော်ပါသည်🙏
No comments:
Post a Comment
winnaing007.mm@gmail.com